काठमाडौं, कात्तिक २ गते ।
नेपाल ओलम्पिक कमिटी (एनओसी) का अध्यक्ष श्री जीवनराम श्रेष्ठले बहराइनमा हुने एशियन युथ गेम्सका लागि नेपाली खेलाडी र प्रशिक्षक टोलीलाई बिदाइ गरेका छन्। खेलकुद यात्रा प्रतियोगिता कात्तिक ५ देखि १४ गतेसम्म सम्म बहराइनमा आयोजना हुने उक्त प्रतियोगितामा नेपालको प्रतिनिधित्व गर्न टोली प्रस्थान गर्न लागेको हो।
समारोहमा अध्यक्ष श्रेष्ठले युवा खेलाडीहरूलाई शुभकामना दिँदै भने, “यो खेलाडीहरूको टोली भविष्यमा एशियन गेम्स र ओलम्पिकमा नेपालको गौरव बढाउने बीउ हो। यसले मुलुकको अन्तर्राष्ट्रिय खेलकुदमा उपस्थिति थप सशक्त बनाउनेछ।”
टोली संरचना र सहभागी खेलहरू
यसपटकको युथ गेम्समा नेपालले विविध खेल विधाहरूमा सहभागिता जनाउने भएको छ। एनओसीको कोषाध्यक्ष श्री टासी घले ‘चिफ डि मिशन’ को जिम्मेवारीमा रहनेछन् भने मुख्यालय अधिकृतको भूमिकामा इन्द्र मल्ल रहनेछन्।
ब्याडमिन्टनमा सविना श्रेष्ठ, गल्फमा रुवेन थापा, जुडोमा समिता नेपाली, मुवाँथाईमा पलेस्था कक्षपति र गेन्जी राई तथा पौडीमा अथर्व सिंह र आर्या महर्जनले नेपालको चुनौती प्रस्तुत गर्ने छन् । अफिसियलमा तिलक पाण्डे (ब्याडमिन्टन), ध्रुवबाबु थापा (गल्फ), देवकीमाया श्रेष्ठ (जुडो), भूपेश शाक्य (मुवाँथाई) र नयना शाक्य (पौडी) रहेका छन् ।
विदाइ कार्यक्रममा एनओसीका उपाध्यक्षहरू ज्योति राणा, चतुरानन्द राजवैद्य, गोपाल सुन्दरलाल कक्षपति, महासचिव राजीव श्रेष्ठ, सचिवहरू रामकृष्ण श्रेष्ठ, रमेश शिवाकोटी तथा मानार्थ उपाध्यक्ष दीपक हर्ष वज्राचार्य लगायत विशिष्ट व्यक्तित्वहरूको उपस्थिति थियो।
नेपालको तर्फबाट युवा उमेरका खेलाडीहरूको विविध खेलमा सहभागिताले महादेशीय स्तरमा नेपालको उपस्थिति बलियो हुँदै गएको संकेत गरेको छ। एनओसीको यस पहलले आगामी दिनमा थप उपलब्धिमूलक नतिजाको अपेक्षा गरिएको छ।