काठमाडौं,असोज ३० गते ।
नेपालले आईसीसी टी-२० विश्वकप एसिया तथा इस्ट एसिया–पेसिफिक (EAP) छनोट प्रतियोगितामा आफ्नो अपराजित यात्रा कायमै राख्दै उपाधिको नजिक पुगेको छ। बुधबार भएको खेलमा नेपालले शक्तिशाली ओमानलाई ३८ रनले पराजित गर्दै चौथो लगातार जित दर्ता गरेको हो।
ओमानले नेपालले दिएको १५२ रनको लक्ष्य पछ्याउने क्रममा निर्धारित २० ओभरमा ९ विकेट गुमाएर ११३ रन मात्र बनाउन सक्यो। ओमानका विनायक शुम्ला १९ बलमा ३२ रन बनाएर सर्वाधिक योगदानकर्ता रहे भने मोहम्मद नदीमले २५ रन जोडे। तर नेपालका बलरहरूको उत्कृष्ट प्रदर्शनका कारण बाँकी ब्याटरहरू लामो समय क्रीजमा टिक्न सकेनन्।
नेपालका युवा बलर गुल्शन झाले पुनः आफ्नो उत्कृष्ट फर्म प्रदर्शन गर्दै ४ ओभरमा २४ रन खर्चिएर ३ विकेट लिए। नन्दन यादव र सोमपाल कामीले समान २–२ विकेट लिए भने सन्दीप लामिछानेले १ विकेट प्राप्त गरे।
त्यसअघि, टस जितेर पहिले ब्याटिङ गरेको नेपालले ओपनर कुशल भुर्तेलको अर्धशतकको सहारामा २० ओभरमा ९ विकेट गुमाउँदै १५१ रनको प्रतिस्पर्धात्मक योगफल बनायो। भुर्तेलले ५१ बलमा ६ चौका र १ छक्का प्रहार गर्दै ६९ रनको शानदार पारी खेले। ओपनिङ साझेदारीमा नेपालले पावरप्ले भित्रै ५३ रन जोड्दै बलियो सुरुवात गरेको थियो।
आसिफ शेखले २४ रनको योगदान दिए भने गुल्शन झाले २ छक्कासहित १८ रन र आदिल आलमले १६ रन बनाए। अन्य ब्याटरहरूबाट भने उल्लेखनीय योगदान प्राप्त हुन सकेन।
ओमानका लागि बलिङमा नदीम खान सबैभन्दा प्रभावकारी रहे — उनले ४ ओभरमा २० रन मात्र दिएर ४ विकेट हात पारे। त्यस्तै शुफिया मेहमुद र जितेन रामानन्दीले समान २–२ विकेट लिए।
यो जितसँगै नेपालले ४ खेलमा ८ अंक जोड्दै तालिकाको शीर्ष स्थानमा उक्लिएको छ। नेपाल र ओमान दुवै टोली यसअघि नै टी–२० विश्वकपको मुख्य चरणका लागि छनोट भइसकेका छन्।
यसअघि नेपालले आइतबार यूएईलाई तथा सोमबार कतारलाई पराजित गरेको थियो। उता ओमानले पनि आइतबार कतार र सोमबार यूएईलाई हराएको थियो।
अब नेपालले शुक्रबार आफ्नो अन्तिम लिग खेल सामोआविरुद्ध खेल्नेछ, जहाँ जित हात पार्न सके उपाधि पनि नेपालको हुने सम्भावना बलियो बनेको छ।
