काठमाडौं ,असोज २४गते।
प्रिमियर लिगका रेफ्री एन्टोनी टेलरले रेफ्रीहरूबाट ‘पूर्णता’ अपेक्षा गर्ने संस्कृतिप्रति असन्तुष्टि जनाएका छन्। उनले आफूले भोग्ने गालीगलौजका कारण उनका परिवारका सदस्यहरूले अब आफ्ना खेल हेर्न नआउने बताएका छन्।
बीबीसी स्पोर्टसँगको अन्तरवार्तामा टेलरले पहिलो पटक २०२३ को युरोपा लिग फाइनलपछि रोमाका समर्थकहरूले विमानस्थलमा आफू र परिवारलाई गरेको दुर्व्यवहारबारे सार्वजनिक रूपमा बोलेका छन्।
४६ वर्षका टेलर भन्छन्, “कहिलेकाहीँ लाग्छ — के यो सबै सार्थक नै हो?” उनका अनुसार, अहिलेको फुटबलमा ‘जसरी पनि जित्ने’ मानसिकताले रेफ्रीहरूको मानसिक स्वास्थ्य र प्रदर्शनमा गम्भीर असर पारेको छ।
तर उनी रेफ्रीको पेशा अझै पनि “संसारका उत्कृष्ट पेशामध्ये एक” भएको बताउँछन्।
टेलर झण्डै १५ वर्षदेखि प्रिमियर लिग रेफ्रीका रूपमा कार्यरत छन्। उनले २०२२ को कतार विश्वकप, पछिल्ला दुई युरोपियन च्याम्पियनसिप र युरोपियन सुपर कप तथा नेसन्स लिग फाइनलमा पनि रेफ्रिङ गरेका छन्।
‘यो मेरो जीवनको सबैभन्दा खराब अनुभव थियो’
२०२३ को युरोपा लिग फाइनलमा रोमाले सेभिलासँग पेनाल्टीमा हार्दा टेलरलाई रोमा प्रशिक्षक जोसे मोरिन्होले खेलपछिको पत्रकार सम्मेलनमा दुईपटक “लज्जास्पद” भनेका थिए। त्यसपछि मोरिन्होले पार्किङ क्षेत्रमा गएर टेलरमाथि आपत्ति जनाएका थिए, जसका लागि उनलाई चार खेलको प्रतिबन्ध लागेको थियो।
उनी फाइनलमा कुल १३ खेलाडीलाई पहेँलो कार्ड देखाउँदै २५ मिनेट थप समय चलाएका थिए।
खेलपछि बुडापेस्ट विमानस्थलमा परिवारसँग हिँडिरहेका टेलरमाथि आक्रोशित समर्थकहरूले गालीगलौज गरेका थिए।
टेलर भन्छन्, “दुर्व्यवहारका हिसाबले त्यो मेरो जीवनको सबैभन्दा खराब स्थिति थियो। म परिवारसँगै यात्रामा थिएँ, त्यसैले त्यो अझ पीडादायी बन्यो। त्यहाँ खेलमा कुनै ठूला गल्ती पनि थिएन।”
उनका अनुसार, खेलपछि ‘कसैलाई दोष दिने’ प्रयास गरिएको महसुस भयो।
“त्यो व्यवहारले निराशा, असन्तुष्टि र क्रोध जगायो,” उनी भन्छन्।
“किन यस्तो स्वीकार्य हुन्छ, मलाई थाहा छैन। ती मानिसहरूलाई पनि कसैले त्यस्तै व्यवहार गरे कस्तो लाग्ला?”
“त्यो घटनापछि मलाई आफैंलाई सोध्न मन लाग्यो — परिवारलाई सँगै ल्याउनु गल्ती त होइन? त्यसपछि उनीहरूले कुनै खेल हेर्न आएका छैनन्।”
मोरिन्होको व्यवहारले समर्थकहरूको दुर्व्यवहारमा प्रभाव पार्यो कि भनेर सोध्दा टेलरले भने, “हो, इमानदार रूपमा भनौं भने, त्यसले असर पारेको थियो।”
