काठमाडौं, असोज २४ गते ।
आईसीसी टी–२० विश्वकप एसिया तथा इस्ट एसिया–प्यासिफिक छनोटको दोस्रो खेलमा नेपालले जापानविरुद्ध मध्यम लक्ष्य प्राप्त गरेको छ।
टस हारेर बलिङ रोजेको नेपालले उत्कृष्ट बलिङ प्रदर्शन गर्दै जापानलाई २० ओभरमा ८ विकेट गुमाएर १३१ रनमै सीमित गरेको हो।
जापानका कप्तान केन्डल काडोवाकी फ्लेमिङले सर्वाधिक ६० रनको योगदान दिए। १० रनमा पहिलो विकेट गुमाएपछि उनले इसार रहमानसँग मिलेर दोस्रो विकेटका लागि ८७ रनको महत्वपूर्ण साझेदारी गरेका थिए। रहमानले ३१ रन बनाएर आउट भए भने त्यसपछि दुई बलमै कप्तान फ्लेमिङ पनि पभेलियन फर्किए। त्यसपछि जापानको रनगति सुस्ताउँदै गएको थियो।
मध्यान्तरपछि नेपालका बलरहरूले नियमित अन्तरालमा विकेट लिन सफल भए। अन्तिम ओभरहरूमा जापानका बेन्जामिन इटो डेभिसले १७ रन जोड्दै टोलीलाई सम्मानजनक स्कोरसम्म पुर्याए।
नेपालका तर्फबाट गुलशन झाले ४ ओभरमा २० रन खर्चेर २ विकेट लिए भने सन्दीप लामिछानेले पनि ४ ओभरमा २५ रन दिँदै २ विकेट झारे। त्यसैगरी सोमपाल कामी र नन्दन यादवले पनि १–१ विकेट हात पारे।
अब नेपालले यो खेल जित्न सकेमा सुपर सिक्स चरणमा २ अंकसहित प्रवेश गर्नेछ। दुवै टोली यसअघि नै सुपर सिक्समा आफ्नो स्थान सुरक्षित गरिसकेका छन्।
नेपाललाई जापानविरुद्ध मध्यम लक्ष्य, सुपर सिक्समा २ अंकसहित प्रवेश गर्ने अवसर