काठमाडौं, असोज २२ गते ।
अल अमेरत, ओमान —घरेलु टोली ओमानले आइसिसी टी–२० विश्वकप छनोट अन्तर्गत एसिया तथा इस्ट एसिया प्यासिफिक क्षेत्रीय छनोटको समूह ‘सी’ मा शानदार सुरुवात गर्दै सामोआमाथि पाँच विकेटको सहज जित हासिल गरेको छ।
बुधबार, अल अमेरतस्थित ओमान क्रिकेट मैदानमा सम्पन्न प्रतियोगिताको पहिलो खेलमा टस हारेर पहिला ब्याटिङ गरेको सामोआले २० ओभरमा ९२ रन बनाएको थियो। जवाफी ब्याटिङमा उत्रिएको ओमानले १६.५ ओभरमै पाँच विकेट गुमाउँदै लक्ष्य पूरा गर्दै प्रतियोगितामा विजयी खाता खोलेको हो।
ओमानको सन्तुलित प्रदर्शन
ओमानका लागि मोहम्मद नदिमले अविजित २१ रनको उपयोगी पारी खेले। यस्तै हमाद मार्जाले १८, आषिश ओडेदराले १५, र आर्यन विष्टले १४ रन बनाए। बलिङतर्फ सामोआका सौमनी तियाईले दुई विकेट लिँदा, ड्यननियल बर्गेस, सोलोमन नाश र कप्तान कालेब जस्मतले एक–एक विकेट लिए।
यसअघि ब्याटिङ गरेको सामोआका लागि फेरेटी सुलुलोटोले २३, रोस टेलरले २२, र सोलोमन नाशले ११ रन बनाएका थिए। ओमानको बलिङ आक्रमणमा कप्तान आमिर कलिम, फैसल शाह र मोहम्मद नदिमले समान २–२ विकेट, भने नदिम खान र हस्नैन शाहले १–१ विकेट हात पारे।
नेपालको पहिलो खेल आज कुवेतविरुद्ध
यसै छनोट प्रतियोगिताको समूह ‘बी’ अन्तर्गत नेपालले आज राति ८:४५ बजे कुवेतसँग आफ्नो पहिलो खेल खेल्नेछ। नेपालले विजयी सुरुवात गर्दै विश्वकप यात्रा बलियो बनाउन चाहन्छ।
नेपाल र कुवेतबीच यसअघि पनि थुप्रै प्रतिस्पर्धा भएका छन्, जसमा दुवै टिमले मिश्रित नतिजा निकालेका छन्। नेपालले दोस्रो खेल आगामी शुक्रबार जापानसँग खेल्ने तालिका रहेको छ।
समूह विभाजन र छनोट प्रक्रिया
यस क्षेत्रीय छनोट प्रतियोगितामा ९ टोली सहभागी छन्, जसलाई तीन समूहमा विभाजन गरिएको छ:
समूह ‘ए’: संयुक्त अरब इमिरेट्स (यूएई), मलेसिया, कतार
समूह ‘बी’: नेपाल, कुवेत, जापान
समूह ‘सी’: ओमान, पपुवा न्युगिनी, सामोआ
प्रतियोगिता सिङ्गल राउन्ड रोबिन लिग प्रणालीमा हुँदैछ, जसअनुसार प्रत्येक समूहबाट शीर्ष दुई टोली ‘सुपर सिक्स’ चरणमा पुग्नेछन्।
सुपर सिक्सका शीर्ष तीन टोलीले आगामी वर्ष भारत र श्रीलंकाको संयुक्त आयोजनामा हुने आइसिसी टी–२० विश्वकपमा स्थान बनाउने छन्।
