काठमाडौं, असोज २३ — हालै मलेसियाको क्वालालम्पुरमा सम्पन्न विश्व कराते महासंघ (WKF) द्वारा आयोजित कराते वान सिरिज प्रतियोगितामा ऐतिहासिक सफलता हात पार्दै स्वर्ण पदक विजेता ‘हिमालयन वारियर’ एरिका गुरुङ सहितको नेपाली कराते टोली बुधबार साँझ स्वदेश फर्किएको छ।
नेपालको नाम अन्तर्राष्ट्रिय स्तरमा चम्काउँदै कराते वान सिरिजमा स्वर्ण पदक जितेकी एरिका गुरुङको यो उपलब्धि नेपाली कराते इतिहासमै एक उल्लेखनीय उपलब्धि मानिएको छ। उनीसँगै प्रतियोगितामा सहभागी कोच कुशल श्रेष्ठ, रेफ्री तारा गुरुङ लगायत अन्य टिम सदस्यहरू पनि स्वदेश फर्केका छन्।
त्रिभुवन विमानस्थलमा भव्य स्वागत
नेपाली टोलीको स्वदेश आगमनमा त्रिभुवन अन्तर्राष्ट्रिय विमानस्थलमा भव्य स्वागत कार्यक्रम आयोजना गरिएको थियो। विमानस्थलमा खेलाडीहरूलाई स्वागत गर्न राष्ट्रिय खेलकुद परिषद् (राखेप) का सदस्य–सचिव टंकलाल घिसिङ, नेपाल सितिरियो कराते महासंघका अध्यक्ष तथा नेपाल कराते महासंघका संस्थापक अध्यक्ष दावा गुरुङ, उपाध्यक्ष मञ्जेन्द्र सिंह, कोषाध्यक्ष कृष्ण गौतम, राष्ट्रिय टिम तयारी निर्देशक दीपक बिष्ट, उप–निर्देशक दीपक श्रेष्ठ, सदस्य प्रेमलाल बम्जन, प्रवक्ता गजेन्द्र खापाङ्गी, रेफ्री श्रीजना अधिकारी र हीरा राई लगायतका विशिष्ट व्यक्तिहरूको उपस्थिति रहेको थियो।
त्यस्तै, काठमाडौं जिल्ला कराते महासंघ अध्यक्ष ज्ञानबहादुर जिम्बा, काठमाडौं जिल्ला शितोकाई कराते अध्यक्ष शिवराज कारांजित, नेपाल प्रहरी खेलकुद महाशाखाका प्रमुख ए.आई.जी. दीपेन्द्र जीसी, तथा नेपाल कराते महासंघसँग सम्बद्ध रेफ्री र खेलाडीहरू समेत उपस्थित भई टोलीप्रति बधाई र सम्मान व्यक्त गरेका थिए।
एरिका गुरुङको ऐतिहासिक सफलता
एरिका गुरुङले यो प्रतियोगितामा नेपाली झण्डालाई गौरवान्वित बनाउँदै प्रतिस्पर्धीहरूलाई पराजित गर्दै स्वर्ण पदक जितेकी हुन्। अन्तर्राष्ट्रिय कराते मञ्चमा महिलातर्फ नेपालको तर्फबाट प्राप्त यो स्वर्णपदक ऐतिहासिक उपलब्धि हो। उनले आफ्नो उत्कृष्ट खेल कौशल र अनुशासनमार्फत भविष्यमा अझ ठूलो सफलता दिलाउने संकेतसमेत दिएकी छिन्।
आगामी तयारी र प्रतिबद्धता
टोलीका कोच, पदाधिकारीहरू तथा खेलकुद परिषद्का प्रतिनिधिहरूले भविष्यमा अझ उच्चस्तरीय तयारी गरी अन्तर्राष्ट्रिय प्रतियोगिताहरूमा नेपाललाई अझ गौरवान्वित बनाउने प्रतिबद्धता व्यक्त गरेका छन्। खेलाडीहरूको समर्पण, मेहनत र सफलताले नेपाली खेलकुदको उज्ज्वल भविष्य संकेत गरेको जनाइएको छ।
