काठमाडौं, असोज १० गते।
सुधारिएको खेल प्रदर्शनका बाबजुद नेपालले यू–१७ साफ च्याम्पियनसिप २०२५ को सेमिफाइनलमा भारतसँग ३–० को हार व्यहोरेसँगै प्रतियोगिताबाट बाहिरिनु परेको छ।
श्रीलंकाको कोलम्बोस्थित रेसकोर्स मैदानमा बिहीबार भएको खेलमा पहिलो हाफ गोलरहित बराबरीमा टुंगिएको थियो। तर दोस्रो हाफमा भारतले आक्रामक शैलीमा फर्किँदै तीन गोल गर्न सफल भयो।
भारतका लागि ६१ औं मिनेटमा गुनलेबिया वाङखेराकपामले पहिलो गोल गर्दै खेलमा अग्रता दिलाए। त्यसपछि अजलान साहले ८० औं मिनेटमा गोल थपे भने अतिरिक्त समयमा डाइमन्ड सिंहले तेस्रो गोल गर्दै जित सुनिश्चित गरे।
नेपालले खेलभरि भारतलाई दबाबमा राख्ने केही प्रयास गरे पनि निर्णायक क्षणमा गोल गर्न नसक्दा सेमिफाइनलमै रोकियो। यस हारसँगै नेपालको यू–१७ साफ च्याम्पियनसिप यात्रा समाप्त भएको हो।
डिफेन्डिङ च्याम्पियन भारत भने फाइनलमा प्रवेश गरेको छ, जहाँ उसको सामना बंगलादेशसँग हुनेछ। शनिबार हुने उपाधि भिडन्त पछिल्लो संस्करणकै पुनरावृत्ति हुनेछ, जब यी दुई टोलीले नै फाइनल खेलेका थिए।
यसअघि बिहीबार भएको पहिलो सेमिफाइनलमा बंगलादेशले पाकिस्तानलाई २–० ले पराजित गर्दै फाइनल प्रवेश पक्का गरेको थियो। बंगलादेशका लागि नजमुल हुडा फयसलले तेस्रो मिनेटमै गोल गरेका थिए भने पाँचौं मिनेटमै ओपु रहमानले अग्रता दोब्बर बनाए। सुरुआती पाँच मिनेटभित्र दुई गोल गरेको बंगलादेशले त्यो अग्रता अन्त्यसम्म कायम राख्यो।
