अष्ट्रेलियन ओपन २०२५ को पुरुष सिंगलतर्फको उपाधि इटालीका विश्व नम्बर एक खेलाडी जेनिक सिनरले जितेका छन् । सिनरले १३ महिनामा भित्र जितेको यो तेश्रो ग्राण्डस्ल्याम उपाधि हो । सिनर २०२४ का पनि अष्ट्रेलियन ओपन च्याम्पियन हुन् ।
अष्ट्रेलियन ओपनको पुरुष सिंगलतर्फको फाइनल इटलीका जेनिक सिनर र जर्मनीका एलेक्जेन्डर ज्वेरेवबीच भएको थियो । फाइनल खेलमा सिनरले ज्वेरेवलाई ६–३, ७–६ र ६–३ को सोझो सेटमा पराजित गर्दै अष्ट्रेलियन ओपनको उपाधि जितेका हुन् । फाइनल खेल २ घण्टा ४२ मिनेटसम्म चलेको थियो ।
विश्व नम्बर एक टेनिस खेलाडी सिनरले सन् २०२४ मा अष्ट्रेलियन ओपन र युएस ओपनको उपाधि जितेका थिए । २३ वर्षिय सिनर तीन पटक ग्राण्डस्ल्यामको फाइनलमा पुग्दा तीन पटक नै उपाधि जित्न सफल भएका छन् । सिनर सन् २०२४ मा फ्रेञ्च ओपन र बिम्वल्डनको सेमिफाइनल पुग्न सफल भएका थिए ।
सन् २०१५ देखि ग्राण्डस्ल्याम खेल्दै आएका जर्मनी ज्वेरेव तीन पटक ग्राण्डस्ल्यामको फाइनलमा पुगेपनि अहिलेसम्म एक पटक उपाधि जित्न सकेका छैनन् । यो पटक पनि उनलाई निरासा नै हात लागेको छ ।
