काठमाडौं, साउन ७ गते ।
जापानको आइची–नागोयामा आगामी सेप्टेम्बर १९ देखि आयोजना हुने २०औँ एसियाली खेलकुदअन्तर्गत महिला भलिबल प्रतियोगिताको समूह विभाजन सार्वजनिक भएको छ । एसियाली भलिबल महासंघ (एभीसी)ले बिहीबार सार्वजनिक गरेको तालिकाअनुसार नेपाल समूह ‘ए’मा परेको छ।
नेपाल रहेको समूहमा आयोजक जापान र इन्डोनेसिया रहेका छन्। समूहका दुवै टोली एसियाली भलिबलका बलिया टोली मानिने भएकाले नेपालले कठिन प्रतिस्पर्धाको सामना गर्नुपर्ने देखिएको छ।
प्रतियोगिताका लागि समूह ‘बी’मा चीन, कजाकिस्तान र फिलिपिन्स परेका छन्। यस्तै, समूह ‘सी’मा थाइल्यान्ड, चाइनिज ताइपेइ, किर्गिस्तान र मंगोलिया रहेका छन् भने समूह ‘डी’मा भियतनाम, दक्षिण कोरिया, हङकङ र कतार समावेश छन्।
नेपालको राष्ट्रिय महिला भलिबल टोली अहिले प्रतियोगिताको तयारीका लागि बन्द प्रशिक्षणमा व्यस्त छ। प्रशिक्षक टोलीले खेलाडीको शारीरिक क्षमता, प्राविधिक कौशल र टोलीको समन्वयमा विशेष ध्यान दिँदै प्रशिक्षणलाई तीव्र बनाएको छ।
नेपालले चीनको हाङझाउमा सम्पन्न १९औँ एसियाली खेलकुदमा ११औँ स्थान हासिल गरेको थियो। सोही प्रदर्शनका आधारमा नेपालले यस संस्करणको प्रतियोगितामा सहभागिता जनाउने अवसर पाएको हो।
एसियाकै प्रतिष्ठित बहुराष्ट्रिय खेल महोत्सव मानिने २०औँ एसियाली खेलकुद जापानको आइची–नागोयामा सेप्टेम्बर १९ देखि अक्टोबर १९ सम्म सञ्चालन हुनेछ। प्रतियोगितामा महादेशका उत्कृष्ट टोलीबीच उपाधिका लागि कडा प्रतिस्पर्धा हुने अपेक्षा गरिएको छ। नेपालले पनि यसपटक अघिल्लो संस्करणको प्रदर्शनलाई सुधार गर्दै प्रभावशाली नतिजा निकाल्ने लक्ष्यका साथ तयारी गरिरहेको छ।