काठमाडौँ, पुस २३ गते।
पोखरा । नेपाल खेलकुद पत्रकार मञ्च (एनएसजेएफ) को आयोजनामा सम्पन्न एनएसजेएफ पल्सर स्पोर्ट्स अवार्ड–२०८१ अन्तर्गत क्रिकेट खेलाडी पूजा महतो वर्षको उत्कृष्ट युवा खेलाडी घोषित भएकी छन्। बुधबार पोखरास्थित प्रदेश सभागृहमा भव्य रूपमा आयोजित अवार्ड समारोहमा उनलाई उक्त सम्मान प्रदान गरिएको हो।
नेपाली क्रिकेटमा निरन्तर उत्कृष्ट प्रदर्शन गर्दै उदाउँदै गरेको प्रतिभाको रूपमा चिनिएकी पूजा महतोले युवा खेलाडीको विधामा प्रतिस्पर्धीहरूलाई पछि पार्दै यो प्रतिष्ठित अवार्ड हात पार्न सफल भइन्। राष्ट्रिय तथा अन्तर्राष्ट्रिय स्तरमा देखाएको क्षमताका कारण उनी निर्णायक मण्डलको रोजाइमा परेकी हुन्।
नेपाल खेलकुद पत्रकार मञ्चले हरेक वर्ष नेपाली खेलकुद क्षेत्रमा उल्लेखनीय योगदान पुर्याउने खेलाडी, प्रशिक्षक तथा टोलीलाई सम्मान गर्दै आएको छ। यस वर्षको अवार्ड समारोहमा कुल ११ विभिन्न विधामा अवार्ड प्रदान गरिने आयोजकले जनाएको छ।
वर्षको उत्कृष्ट युवा खेलाडीको अवार्डका लागि एथलेटिक्सका अजय विक, करातेकी अञ्जली महर्जन, क्रिकेटकी पूजा महतो, बक्सिङकी स्वस्तिका तिरुवा र फुटबलका समीर तामाङ मनोनयनमा परेका थिए। तीमध्ये पूजा महतोले उत्कृष्ट प्रदर्शनका आधारमा अवार्ड जित्न सफल भइन्।
यसअघि नै खो–खो खेलतर्फ महिला र पुरुष दुवै टोली वर्षको उत्कृष्ट खेल टिम घोषित भइसकेका छन्। अवार्ड समारोहले नेपाली खेलकुदको विकास र खेलाडीहरूको हौसला अभिवृद्धि गर्न महत्वपूर्ण भूमिका खेलेको आयोजकको भनाइ छ।
एनएसजेएफ पल्सर स्पोर्ट्स अवार्डले खेलाडीहरूको मेहनत र समर्पणको कदर गर्दै उनीहरूलाई थप प्रेरणा प्रदान गर्ने विश्वास लिइएको छ।
