काठमाडौं, मंसिर ३ गते ।
हर्मित सिंहको अलराउन्डर प्रदर्शनप्रेरित सुदूरपश्चिम रोयल्सले नेपाल प्रिमियर लिग (एनपीएल) मा काठमाण्डू गोर्खाजविरुद्ध २९ रनको जित निकालेको छ ।
बुधबार कीर्तिपुरस्थित त्रिवि क्रिकेट मैदानमा सुदूरपश्चिमले प्रस्तुत गरेको १४८ रनको लक्ष्य पछ्याउने क्रममा काठमाण्डूले १६.५ ओभरमा सबै विकेट गुमाएर ११८ रनमात्र बनाउन सक्यो । नेपाल प्रिमियर लिग (एनपीएल) क्रिकेटमा सुदूरपश्चिम रोयल्सले बुधबार काठमाडौँ गोर्खाजविरुद्ध प्रतिस्पर्धात्मक लक्ष्य प्रस्तुत गरेको छ। टस जितेर फिल्डिङ रोजेको काठमाडौँका विरुद्ध सुदूरपश्चिमले त्रिवि अन्तर्राष्ट्रिय क्रिकेट मैदानमा निर्धारित २० ओभर पूरा खेल्दै सबै विकेट गुमाएर १ सय ४७ रन जोड्यो।
सुदूरपश्चिमका तर्फबाट सर्वाधिक रन बनाउने क्रममा हरमित सिंह चम्किए। उनले २० बलमा आक्रामक ५३ रन बनाए, जसमा दुई चौका र छ छक्का समावेश थियो। १९ बलमै आफ्नो अर्धशतक पूरा गर्दै उनले एनपीएल इतिहासकै दोस्रो छिटो फिफ्टी समेत दर्ता गरे। सन्नी पटेलको बलमा साहब आलामद्वारा क्याच भएसँगै उनको पारी समाप्त भएको थियो।
टिमका कप्तान दीपेन्द्रसिंह ऐरीले पनि ३० बलमा ३९ रनको योगदान दिए। उनले व्यक्तिगत ११ र १२ रनको अवस्थामा दुई पटक जीवनदान पाएपछि पारी सम्हालिएको थियो। दीपेन्द्रले हरमितसँग सातौँ विकेटका लागि २५ बलमा ६१ रनको महत्वपूर्ण साझेदारी गर्दै टिमको पारी उकास्ने काम गरे।
तर सुदूरपश्चिमको सुरुआत निकै कमजोर रह्यो। सुरुवाती ४ रनमै टिमले ३ विकेट गुमाउँदै दबाबमा परेको थियो। ओपनर जोस ब्राउन र विनोद भण्डारी दुवै शून्यमै आउट भए भने स्टार ब्याटर क्रिस लिन पनि २ रनमा पभेलियन फर्किए। यी तीनै विकेट करणले लिएका थिए।
चौथो विकेटका लागि आरिफ सेख र इसान पाण्डेले २३ रन जोडे। इसान ११ रनमा आउट हुँदा आरिफले २५ रन बनाए। २४ बलमा तीन चौका प्रहार गरेका आरिफलाई रसिद खानले एलबीडब्लू आउट गराए। त्यसपछि आरिफ र दीपेन्द्रले २५ रनको अर्को साझेदारी थपे।