काठमाडौं, कात्तिक २६ गते।
एभरेष्ट महिला भलिबल लिग अन्तर्गत आज काठमाडौंमा भएको पहिलो खेलमा कर्णाली यशविसले मधेस युनाइटेडलाई प्रभावशाली प्रदर्शन गर्दै सोझो तीन सेटमा पराजित गरेको छ।
त्रिपुरेश्वरस्थित राष्ट्रिय खेलकुद परिषद् (राखेप)को कभर्डहलमा सम्पन्न खेलमा कर्णालीले शुरुदेखि नै दबदबा जमाउँदै ३–० को सोझो सेटमा विजयी हात पारेको हो।
पहिलो सेटमा कर्णालीले उत्कृष्ट खेल प्रदर्शन गर्दै २५–१५ ले मधेसलाई पछि पार्यो। दोस्रो सेटमा पनि कर्णाली अझै बलियो रूपमा हाबी रह्यो र २५–१२ ले जीत दर्ता गर्यो। तेस्रो सेटमा मधेसले केही संघर्ष देखाए पनि कर्णालीले पुनः २५–१७ को नतिजासहित विजय सुनिश्चित गर्यो।
जारी प्रतियोगितामा कर्णाली यशविस अहिलेसम्म अपराजित टोलीका रूपमा अघि बढेको छ। टिमको प्रदर्शनले समूह चरणमै उपाधि दाबेदारको रूपमा कर्णालीलाई बलियो रूपमा स्थापित गरेको टिप्पणी खेल विज्ञहरूले गरेका छन्।
यसअघि प्रतियोगिताका प्रारम्भिक चरणका खेल पोखरामा सम्पन्न भएका थिए। तर, गत भदौ २३ र २४ गतेको जेन-जी आन्दोलनका कारण रोकिएका खेलहरू आजदेखि काठमाडौंमा पुनः सुरु भएका हुन्।
आजै लिगको दोस्रो खेलमा ललितपुर क्वीन्स र पोखरा निन्जाजबीच रोमाञ्चक प्रतिस्पर्धा भइरहेको छ।
