काठमाडौं, असोज २३ गते ।
मस्कट, ओमानमा जारी आईसीसी टी–२० विश्वकप एसिया तथा इस्ट एसिया प्यासिफिक क्षेत्रीय छनोट प्रतियोगितामा नेपालले आफ्नो पहिलो खेलमा बुधबार राति भएको खेलमा शानदार प्रदर्शन गर्दै विजयी सुरुवात गरेको छ। बुधबार राति सम्पन्न खेलमा नेपालले कुवेतलाई ५८ रनको फराकिलो अन्तरले पराजित गर्दै प्रतियोगितामा उत्कृष्ट सुरुवात गरेको हो।
टस हारेर पहिले ब्याटिङ गरेको नेपालले निर्धारित २० ओभरमा ७ विकेटको क्षतिमा १४१ रन बनायो। नेपालको इनिङ्सको मुख्य आकर्षण ओपनर कुशल भुर्तेलको अर्धशतक रह्यो। उनले ५६ बलमा ३ चौका र ३ छक्काको मद्दतले ६६ रन बनाए।
त्यसैगरी, मिडल अर्डरमा दीपेन्द्रसिंह ऐरीले २० रन बनाए भने गुल्शन झाले अन्तिमतिर ६ बलमा २० रनको आक्रमणकारी क्यामियो खेले। विशेषगरी १९औं ओभरको अन्तिम तीन बलमा उनले लगातार तीन छक्का प्रहार गर्दै टोलीलाई प्रतिस्पर्धात्मक स्कोरमा पुर्याए।
कुवेतका बलरहरूमध्ये अनुदीप चेन्थामाराले २ विकेट लिएर सबैभन्दा प्रभावशाली प्रदर्शन गरे। उनले ४ ओभरमा मात्र २२ रन खर्चिए। त्यस्तै नवीन राजले ४ ओभरमा ४० रन दिएर २ विकेट, र मोहम्मद असलम तथा अकिफ फारुकले १–१ विकेट लिए।
नेपालको बलिङ आक्रमणले चम्कियो
१४२ रनको लक्ष्य पछ्याउने क्रममा कुवेतको इनिङ्स नेपालका बलरहरूका अगाडि धराशायी भयो। कुवेत १८.१ ओभरमै जम्मा ८३ रनमा अलआउट भयो। कुवेतका लागि क्लिन्टो अन्टोले २६ रन र यासिन पटेलले १९ रन बनाए। बाँकी ब्याटरहरूले उल्लेखनीय योगदान दिन सकेनन्।
नेपालका बलरहरूले सामूहिक प्रदर्शन गरे। ललित राजवंशी, सन्दीप लामिछाने र कप्तान रोहित पौडेल — तिनैले समान रूपमा २–२ विकेट लिए।
राजवंशीले ४ ओभरमा १७ रन मात्र खर्चेर २ विकेट लिँदा, सन्दीपले ४ ओभरमा २२ रन दिएर २ विकेट हात पारे। कप्तान पौडेलले २ ओभरमा मात्र ७ रन खर्चेर २ विकेट लिँदै बलिङतर्फ पनि जिम्मेवारीपूर्वक भूमिका निर्वाह गरे।
त्यस्तै कुशल भुर्तेल, सोमपाल कामी र नन्दन यादवले १–१ विकेट लिएर कुवेतको पारी सम्हालिन नदिने काम गरे।
सुपर सिक्समा नेपालको स्थान पक्का
यो जितसँगै नेपालले समूह चरणमा उत्कृष्ट सुरुवात गर्दै सुपर सिक्समा स्थान सुरक्षित गरेको छ। अब नेपालले समूह चरणको दोस्रो खेल शुक्रबार जापानविरुद्ध खेल्नेछ।
नेपालको पहिलो प्रदर्शन हेर्दा टोलीले बलिङ, ब्याटिङ दुवै पक्षमा सन्तुलित प्रदर्शन गरेको छ, जसले आगामी खेलहरूमा पनि आशावादी बनाउँछ।
