काठमाडौं,असोज २१ गते ।
क्वालालम्पुर, मलेसिया –इन्दु बर्मा र रुविना क्षेत्रीको संयमित तथा अनुभवी ब्याटिङको बलमा नेपाली महिला क्रिकेट टोलीले मलेसियाविरुद्धको पाँच खेलको टी-२० अन्तर्राष्ट्रिय शृङ्खलाको चौथो खेलमा शानदार जित दर्ता गरेको छ। नेपालले मलेसियालाई ६ विकेटले पराजित गर्दै सिरिज २–२ को बराबरीमा ल्याएको हो।
क्वालालम्पुरमा आयोजित खेलमा टस जितेर पहिला ब्याटिङ गरेको मलेसियाले २० ओभरमा ५ विकेट गुमाउँदै १११ रनको प्रतिस्पर्धात्मक योगफल खडा गरेको थियो। जवाफी लक्ष्य पछ्याउने क्रममा इन्दु र रुविनाले संयमित तर आक्रामक ब्याटिङ गर्दै नेपाललाई १७.३ ओभरमै लक्ष्यमा पुर्याए।
नेपालको जितमा इन्दु बर्मा ४८ रनमा अविजित रहिन्। उनले ३९ बल खेलिन् र अन्त्यमा विजयी चौका प्रहार गर्दै खेल टुंग्याइन्। अर्की अनुभवी ब्याटर रुविना क्षेत्रीले पनि २३ बलमा २३ रनको योगदान दिँदै इन्दुसँगै नटआउट रहिन्। कविता कुँवरले सुरुआती अवस्थामा आक्रामक ब्याटिङ गर्दै २६ बलमा १६ रन जोडिन्। अन्य खेलाडीहरूमध्ये रुवि पोदार ५, सम्झना खड्का ११, र पुजा महतो ७ रनमा आउट भइन्।
मलेसियाको लागि मास इलिसा सबैभन्दा चम्किएकी ब्याटर रहिन्। उनले ६३ बलमा अविजित रहँदै उत्कृष्ट ५६ रन बनाइन्। त्यस्तै माहिराहले २१ बलमा १८ रन र नुर डानियाले १५ बलमा १५ रन बनाइन्।
नेपालका लागि बलिङतर्फ कविता कुँवर सबैभन्दा सफल रहिन्। उनले ४ ओभरमा मात्र १० रन खर्चेर ३ विकेट लिइन्। पुजा महतो र कविता जोशीले १–१ विकेट लिएर टोलीलाई योगदान पुर्याए।
अब पाँच खेलको शृङ्खलामा दुई टोली २–२ को बराबरीमा छन्। निर्णायक पाँचौं तथा अन्तिम खेल अब सिरिजको विजेता टुंगो लगाउने निर्णायक म्याच हुनेछ।
