काठ्माण्डौ, असोज २ – घरेलु टोली संयुक्त अरब इमिरेट्स (यूएई)लाई ४१ रनको फराकिलो अन्तरले पराजित गर्दै पाकिस्तानले एसीसी ट्वान्टी–२० एसिया कपको सुपर–४ चरणमा स्थान पक्का गरेको छ। बुधबार दुबई अन्तर्राष्ट्रिय क्रिकेट मैदानमा भएको समूह ‘ए’ अन्तर्गतको महत्वपूर्ण खेलमा पाकिस्तानले सशक्त प्रदर्शन गर्दै जित हासिल गरेको हो।
टस हारेर पहिले ब्याटिङ गरेको पाकिस्तानले निर्धारित २० ओभरमा नौ विकेट गुमाउँदै १४६ रनको योगफल तयार पारेको थियो। पाकिस्तानका ओपनर फखर जमानले उत्कृष्ट अर्धशतक प्रहार गर्दै ३६ बलमा ५० रन बनाए। उनको इनिङ्समा दुई चौका र तीन छक्का समावेश थियो। त्यसैगरी, पारीको उत्तरार्धमा बलिवर शाहिन शाह अफ्रिदीले अविजित २९ रन जोड्दै टोलीलाई सन्तोषजनक स्कोरमा पुर्याए। कप्तान सलमान आगाले २० र मोहम्मद ह्यारिसले १८ रन बनाए।
यूएईका बलरहरूमध्ये जुनैद सिद्धिकीले चार विकेट लिए भने समरजित सिंहले तीन विकेट हात पारे। ध्रुव पराशरले पनि एक विकेट खसाल्दै पाकिस्तानको ब्याटिङ लाइनअपलाई नियमित रूपमा दबाबमा राखेका थिए।
तर १४७ रनको लक्ष्य पछ्याउन उत्रिएको यूएईको पारी भने पाकिस्तानको घातक बलिङअगाडि धराशायी भयो। निर्धारित २० ओभर पूरा गर्न नपाउँदै यूएई १७.४ ओभरमै १०५ रनमा अलआउट भयो। यूएईका राहुल चोपडाले सर्वाधिक ३५ रन जोडे भने ध्रुव पराशरले २० रनको योगदान गरे। मोहम्मद वासिम १४ रनमा आउट भए भने अलिशान शराफूले १२ रन बनाए।
पाकिस्तानका बलरहरू उत्कृष्ट रहे। अब्रार अहमद, शाहिन शाह अफ्रिदी र ह्यारिस रौफले समान दुई–दुई विकेट लिए। त्यस्तै, कप्तान सलमान आगा र सइम अयुबले समान एक–एक विकेट हात पारे।
यस जितसँगै पाकिस्तानले समूह ‘ए’ अन्तर्गत तीन खेलमा चार अंक जोड्दै दोस्रो स्थानमा रह्यो र सुपर–४ मा आफ्नो स्थान सुरक्षित गर्यो। सो समूहबाट भारतले यसअघि नै सुपर–४ मा प्रवेश गरिसकेको छ। यूएई भने समान तीन खेलमा दुई अंक मात्र जोड्दै प्रतियोगिताबाट बाहिरिएको छ।
यस जितसँगै पाकिस्तान र भारत दुबै सुपर–४ मा पुगेका छन्। अब क्रिकेटप्रेमीहरूले एशियाली क्रिकेटका ठूला भिडन्तहरू आगामी दिनमा सुपर–४ मा हेर्ने अवसर पाउने छन्। पाकिस्तानको यो जितले उनीहरूलाई मनोबल उच्च बनाएको छ भने यूएईको साहसिक यात्रा भने यहीँ आएर टुंगिएको छ।
