सूर्य नेपाल गल्फ टुर २०२४–२५ अन्तर्गतको सातौं प्रतियोगिता सूर्य नेपाल च्यालेन्जको दोस्रो दिन पूर्व नम्बर एक गल्फर शुक्रबहादुर राईले एकल अग्रता बनाएका छन् । समग्रमा ६–अन्डर १ सय ३० को स्कोरमा उनले बुधबार दिनेश प्रजापतिलाई १ स्ट्रोकले पछि पारेका छन् । शुक्रले १–ओभर ६९ को स्कोर गरे । समग्रमा ५–अन्डर १ सय ३१ को स्कोरमा दिनेश प्रजापति दोस्रो स्थानमा उक्लिएका छन् । उनले १–अन्डर ६७ को कार्ड बनाए ।
भेट्रान प्रो रामे मगर र पहिलो दिनका संयुक्त लिडर भुवनकुमार रोक्का समग्रमा ३–अन्डर १ सय ३३ को स्कोरमा तेस्रो स्थानमा छन् । रामेले १–अन्डर ६७ को स्कोर गरे । भुवनले खराब प्रदर्शन गर्दै ४–ओभर ७२ मा दोस्रो दिनको खेल सकाए । समग्रमा १–अन्डर १ सय ३५ को स्कोरमा सञ्जय लामा, निरज तामाङ र प्रदीपकुमार लामाले संयुक्त रूपमा पाँचौं स्थानमा छन् । सञ्जयले २–अन्डर ६६ स्कोर गर्दा निरज र प्रदीपले इभन–पार ६८ को स्कोर बनाए । समग्रमा १–ओभर १ सय ३७ को स्कोरमा तोरण विक्रम शाही, वसन्तराज गुरुङ र साबिक विजेता रवि खड्का संयुक्त रूपमा आठौं स्थानमा रहे । तोरणले १–अन्डर ६७ स्कोर गर्दा वसन्तले इभन–पार ६८ र रविले २–ओभर ७० स्कोर गरे । पहिलो दिन ७–अन्डर खेलेका शुक्रले आज सो लयलाई निरन्तरता दिन सकेनन् । पहिलो होलको बर्डीका विरुद्ध नवौं होलको बोगीले फ्रन्टनाइन इभन–पार ३४ मा सकाए । यसपछि १३ औं होलमा एक सट बचाए पनि १५औं र १८औं होलमा बोगीको सामना गरे । ब्याक नाइन १–ओभर ३५ मा पूरा गरे ।
दिनेशले तेस्रो होलमा एक सट खेर फाले । छैटौं होलको बर्डीले फ्रन्टनाइन इभन–पार ३४ खेले । यसपछि १०औं र १३औं होलमा बर्डी प्रहार गरे । अन्तिम होलको बोगीले ब्याक नाइन १–अन्डर ३३ मा सकाए । रामेले नवौं होलको बोगीले फ्रन्ट नाइनमा १–ओभर ३५ को स्कोर गरे । १०औं र १५औं होलमा बर्डीको सफलता प्राप्त गरे । उनले ब्याक नाइनमा २–अन्डर ३२ को नतिजा निकाले । पहिलो दिनका लिडर भुवनले खराब प्रदर्शन गर्दा तेस्रो स्थानमा झरे । उनले फ्रन्ट नाइन र ब्याक नाइन दुवै २–ओभर ३६ मा पूरा गरे । उनले छैटौं नवौं, १४औं र १८औं होलमा बोगी प्रहार गरे । एमेच्योरतर्फ राहुल विश्वकर्मा समग्रमा १–ओभर १ सय ३७ को स्कोरमा शीर्षस्थानमा छन् । उनले १–ओभर ६९ को स्कोर जोड्दै निश्चयजंग रायमाझीलाई एक स्ट्रोकले पछि पारे । निश्चयले १–ओभर ६९ स्कोर गर्दे समग्रमा २–ओभर १ सय ३८ स्कोर बनाए । ३६ होलको समाप्तीमा ९–ओभर १ सय ४५ सम्म स्कोर गरेका २३ प्रोफेसनल र २ एमेच्योर गरी २५ गल्फरले कट बनाएका छन् ।
प्रोफेसनलतर्फ जयराम श्रेष्ठ, भुवन नगरकोटी, रामकृष्ण श्रेष्ठ, राजेन्द्र श्रेष्ठ प्रधान, रमेश अधिकारी, दीपक मगर, धनबहादुर थापा, सुनिल केसी, टंकबहादुर कार्की, किसन कालीराज सुनार, शिवराम पौडेल, राजेन राई र सुमन परियारले कट बनाउन सफल भए । ७२ होलको चार दिने प्रतियोगितामा ३६ प्रोफेसनल र ११ एमेच्योर गरी कुल ४७ खेलाडी प्रतिस्पर्धा गरिरहेका छन् ।
प्रतियोगिताको कुल पुरस्कार राशि ६ लाख रुपैयाँ रहेको छ । विजेताले १ लाख १० हजार, दोस्रो र तेस्रो हुनेले क्रमशः ७० हजार र ५० हजार हात पार्नेछन् । साथै शीर्ष २१ भित्र पर्ने प्रोफेसनल गल्फरहरूले पनि नगद प्राप्त गर्नेछन् । चार दिनको मुख्य स्पर्धापश्चात् शनिबार प्रो–एम प्रतिस्पर्धा हुनेछ ।