चेन्नई सुपर किंग्सले इन्डियन प्रिमियर लिग क्रिकेटमा सोमबार लखनउ सुपर जायन्ट्सलाई ५ विकेटले पराजित गरेको छ । चेन्नईले लगातार ५ खेलको हार शृंखलाबाट पुनरागमन गरेको छ । चेन्नईको सातौं खेलमा यो दोस्रो जित हो । १ सय ६७ रनको लक्ष्य पछ्याएको चेन्नईका लागि शिवम दुवे र महेन्द्रसिंह धोनीले छैटौं विकेटमा ५७ रनको अविजित साझेदारी गर्दै ३ बल बाँकीमा टोलीलाई जिताए । दुबेले ३७ बलमा ३ चौका र २ छक्कासहित ४३ रन र धोनीले ११ बलमा ४ चौका र १ छक्कासहित २६ रन बनाए । ओपनर शेख रशिद र रचिन रवीन्द्रले चेन्नईलाई आक्रामक सुरुआत दिलाएका थिए । उनीहरूले अर्धशतकीय साझेदारी गरेका थिए । रशिदले १९ बलमा ६ चौकासहित २७ र रवीन्द्रले २२ बलमा ५ चौकासहित ३३ रन जोडेका थिए । लखनउका रवि विष्णोइले दुई विकेट लिए । त्यसअघि लखनउले ऋषभ पन्तको कप्तानी इनिङ्समा ७ विकेट गुमाई १ सय ६६ रन बनाएको थियो । उनले ४९ बलमा ४ छक्का र ४ चौका प्रहार गरी ६३ रन बनाए । ओपनर मिचेल मार्सले २ चौका र २ छक्कामा ३०, आयुष बदोनीले २२ र अब्दुल समदले २० रन बनाए । आयुष र अब्दुल दुवै समान दुई चौका हाने । ओपनर एडम मारक्रम (६) लाई लखनउले पहिलो ओभरमै गुमाएको थियो । चेन्नईबाट रवीन्द्र जडेजा र माथिशा पाथिरानाले समान २ विकेट लिएका थिए ।
७ खेलमा ४ जितसहित लखनउ ८ अंक लिएर चौथो स्थानमा यथावत छ । चेन्नई पुछारमै छ ।