सिता राना मगरको कीर्तिमानी व्यक्तिगत उत्कृष्ट बलिङ बाबजुत नेपाल लगातार तेस्रो खेलमा पनि पराजित भएको छ ।
नेपालले सिरिजमा लगातार तेस्रो खेलमा हार बेहोर्ने क्रममा आइतवार नेदरल्याण्ड्ससँग १५ रनले पराजित भयो । नेपालले बिहीवार पनि नेदरल्याण्ड्ससँग हार बेहोरेको थियो ।
आज १ सय ४१ रनको लक्ष्य पछ्याएको नेपालले निर्धारित २० ओभरमा सबै विकेट गुमाएर १ सय २५ रन बनायो ।
नेपालका लागि कप्तान इन्दु बर्माले सर्वाधिक ३० रन जोडिन् । उनले ३२ बलमा १ छक्का प्रहार गरिन् । सम्झना खड्काले २४ बलमा ४ चौकाको सहयोगमा २३ रन बनाइन् । पुजा महतोले १८, कविता जोशीले १४ तथा सिताले नट आउट रहँदै १० रन थपिन् ।
त्यसअघि कीर्तिपुरमा रहेको टियु मैदानमा जारी खेलमा टस जितेर पहिले ब्याटिङ गरेको नेदरल्याण्ड्सले निर्धारित २० ओभरमा ९ विकेट गुमाएर १ सय ४० रनको योगफल तयार गरेको थियो ।
नेदरल्याण्ड्सका लागि कप्तान बाबेट डि लिडेले सर्वाधिक ४१ रन जोडिन् । उनले ३८ बलमा ४ चौका र १ छक्का प्रहार गरिन् ।
हिटर सिगर्सले २३ बलमा ३ चौका र १ छक्काको सहयोगमा २६ रन जोडेकी थिइन् । रोबिन रिके र फेबी मोलकिनरले समान २१ रन बनाइन् ।
नेपालका लागि सिताले ३ ओभरमा १२ रन खर्चिएर ५ विकेट लिइन् । यो सिताको उत्कृष्ट बलिङ हो । यो उनको यसअघि सिताले हङकङविरुद्ध २०२३ अगस्ट २२ मा १६ रन खर्चिएर ५ विकेट लिएकी थिइन् ।
मनिषा उपाध्यायले २ , कविता जोशी तथा इन्दु बर्माले समान १ विकेट लिइन् ।
सिरिजमा नेपाल, नेदरल्याण्ड्स र थाइल्याण्डको सहभागिता रहेको छ । सहभागी ३ टोलीले एक आपससँग ३ खेल खेल्नेछन् । अंक तालिकाको शीर्ष स्थानमा रहने टोली विजेता बन्नेछ । नेदरल्याण्ड्स ३ खेलमा २ अंकमा रहेको छ ।
सुरुवाती ३ खेलमा पराजित नेपाल तालिकामा अंकबिहीन रहेको छ । नेपाल सिरिजको पहिलो खेलमा नेदरल्याण्ड्स र दोस्रो खेलमा थाइल्याण्डसँग पराजित भएको थियो ।
नेपालले मंगलवार थाइल्याण्डसँग खेल्नेछ । नेदरल्याण्ड्स र थाइल्याण्डबिचको खेल सोमवार हुनेछ।
