काठमाडौं, माघ १७ गते ।
काठमाडौं । यही फेब्रुअरीको दोस्रो सातादेखि थाइल्यान्डमा सुरु हुने एसीसी राइजिङ स्टार्स महिला एसिया कप क्रिकेट प्रतियोगितामा नेपाली राष्ट्रिय महिला क्रिकेट टोलीको कप्तानी पूजा महतोले गर्ने भएकी छन् । नियमित कप्तान इन्दु बर्मा चोटका कारण कम्तीमा आठ सातासम्म मैदान बाहिर रहने भएपछि यसअघिकी उपकप्तान पूजालाई कप्तानीको जिम्मेवारी दिइएको हो ।
नेपाल क्रिकेट संघ (क्यान) ले प्रतियोगिताका लागि पूजाको कप्तानीमा १५ सदस्यीय नेपाली टोली घोषणा गरेको छ । पूजा महतोले पहिलोपटक सिनियर राष्ट्रिय टोलीको कप्तानी गर्ने अवसर पाएकी हुन् । यसअघि उनले नेपाली यू–१९ महिला टोलीको कप्तानी गर्दै यू–१९ महिला टी–२० विश्वकपमा टोलीको नेतृत्व गरिसकेकी छन् ।
क्यानले सार्वजनिक गरेको टोलीमा अनु कडायत, सीमाना केसी र रुबी पोद्दारले स्थान बनाएका छन् । यता, हालै सम्पन्न विश्वकप छनोट खेल्ने टोलीबाट रचना चौधरी, राजमती ऐरी र कप्तान इन्दु बर्मा भने टोलीबाट बाहिरिएका छन् । चोटका कारण इन्दु बर्मा प्रतियोगितामा सहभागी हुन नसक्ने भएपछि टोलीमा नयाँ संयोजन गरिएको हो ।
राइजिङ स्टार्स महिला एसिया कपमा नेपाल समूह ‘ए’ मा परेको छ । समूह ‘ए’ मा नेपालसँगै भारत ‘ए’, पाकिस्तान ‘ए’ र यूएई रहेका छन् । समूह ‘बी’ मा बंगलादेश ‘ए’, श्रीलंका ‘ए’, मलेसिया र आयोजक थाइल्यान्ड सहभागी छन् । प्रतियोगितामा एसियाका उदीयमान महिला क्रिकेट टोलीबीच प्रतिस्पर्धा हुने भएकाले नेपाली टोलीका लागि यो प्रतियोगिता निकै महत्वपूर्ण मानिएको छ ।
फेब्रुअरी १३ देखि सुरु हुने प्रतियोगिताको पहिलो खेलमा नेपालले पाकिस्तान ‘ए’ सँग प्रतिस्पर्धा गर्नेछ । सोही दिन भारत ‘ए’ र यूएईबीच पनि खेल हुनेछ । समूह चरणका खेलपछि शीर्ष टोलीहरू सेमिफाइनलमा पुग्नेछन् ।
नयाँ कप्तान पूजा महतोको नेतृत्वमा नेपाली टोलीले राम्रो प्रदर्शन गर्ने अपेक्षा गरिएको छ । युवा खेलाडीहरूलाई समेटेर बनाइएको टोलीले अन्तर्राष्ट्रिय अनुभव बटुल्ने अवसर पाउने क्यानले जनाएको छ । प्रतियोगितामा उत्कृष्ट प्रदर्शन गर्दै नेपालको महिला क्रिकेटलाई थप उचाइमा पुर्याउने लक्ष्यका साथ टोली थाइल्यान्ड प्रस्थान गर्ने तयारीमा छ ।