काठमाडौं, पुस २९ गते ।
अस्ट्रेलियन महिला क्रिकेट टोलीकी कप्तान एलिसा हेलीले अन्तर्राष्ट्रिय क्रिकेटबाट सन्यास लिने घोषणा गरेकी छन् । ३५ वर्षीया हेलीले भारतसँग हुने घरेलु शृङ्खलापछि सबै ढाँचाको अन्तर्राष्ट्रिय क्रिकेटबाट बिदा लिने बताएकी हुन् । यससँगै करिब दुई दशक लामो सफल अन्तर्राष्ट्रिय क्रिकेट यात्रामा उनले पूर्णविराम लगाउने भएकी छन् ।
हेलीले आउँदो फेब्रुअरीमा आयोजना हुने महिला टी–२० अन्तर्राष्ट्रिय खेलहरू नखेल्ने निर्णय गरिसकेकी छन् । उनका अनुसार भारतसँग हुने आगामी एकदिवसीय तथा टेस्ट शृङ्खलानै उनको अन्तिम अन्तर्राष्ट्रिय सहभागिता हुनेछ । अनुभवी विकेटकिपर–ब्याटर हेलीको सन्यास घोषणालाई अस्ट्रेलियन क्रिकेटका लागि ठूलो क्षतिका रूपमा हेरिएको छ ।
अन्तर्राष्ट्रिय क्रिकेटमा हेलीको करिअर अत्यन्तै सफल र प्रभावशाली रह्यो । महिला एकदिवसीय क्रिकेटमा उनले १ सय २३ खेल खेल्दै ७ शतक र १८ अर्धशतकसहित ३ हजार ५ सय ६३ रन बनाइन् । आक्रामक ब्याटिङ शैली र दबाबका क्षणमा जिम्मेवारी सम्हाल्ने क्षमताका कारण उनी टोलीका लागि भरपर्दो खेलाडीका रूपमा स्थापित भइन् ।
त्यस्तै, महिला टी–२० अन्तर्राष्ट्रिय क्रिकेटमा हेलीले १ सय ६२ खेलमा १ शतक र १७ अर्धशतकसहित ३ हजार ५४ रन जोडिन् । छोटो ढाँचामा पनि निरन्तर प्रदर्शन गर्दै उनले अस्ट्रेलियाको शीर्ष क्रमलाई मजबुत बनाइन् । विकेटकिपरका रूपमा उनको फुर्तिलोपन र सुरक्षित क्याचिङले पनि टोलीलाई धेरै खेलमा फाइदा पुर्याएको थियो ।
टेस्ट क्रिकेटमा पनि हेलीको योगदान उल्लेखनीय रह्यो । उनले १० टेस्ट खेलमा ३ अर्धशतकसहित ४ सय ८९ रन बनाउँदै ब्याटर र विकेटकिपर दुवै भूमिकामा सन्तुलित प्रदर्शन गरिन् । सीमित टेस्ट अवसर पाएको महिला क्रिकेटमा हेलीले आफ्नो प्रभाव छोड्न सफल भइन् ।
टोलीगत सफलताको कुरा गर्दा एलिसा हेली अस्ट्रेलियाका स्वर्णिम उपलब्धिहरूको केन्द्रमा रहिन् । उनले अस्ट्रेलियाका लागि ६ पटक महिला टी–२० विश्वकप र २ पटक महिला एकदिवसीय विश्वकप जित्न महत्वपूर्ण भूमिका निभाइन् । यी उपलब्धिले उनलाई अस्ट्रेलियन महिला क्रिकेट इतिहासकै सबैभन्दा सफल खेलाडीमध्ये एकको रूपमा स्थापित गरेको छ ।
हेलीको सन्यासपछि अस्ट्रेलियन टोलीले आउँदो महिला टी–२० विश्वकपको तयारी नयाँ कप्तानको नेतृत्वमा गर्नुपर्नेछ । अनुभवी कप्तान र खेलाडीको अभावले टोलीलाई चुनौती थपिने भए पनि हेलीले निर्माण गरेको बलियो संरचनाले भविष्यमा पनि अस्ट्रेलियन महिला क्रिकेट प्रतिस्पर्धी रहने अपेक्षा गरिएको छ ।
क्रिकेट समर्थक र विश्लेषकहरूले एलिसा हेलीको सन्यासलाई महिला क्रिकेटका लागि एउटा युगको अन्त्यका रूपमा लिएका छन् । उनको नेतृत्व, समर्पण र निरन्तर प्रदर्शनले विश्व महिला क्रिकेटमा अस्ट्रेलियाको प्रभुत्व कायम राख्न ठूलो योगदान पुर्याएको छ ।