काठमाडौं, असोज २८ गते।
काठमाडौँ । एएफसी एसियन कप छनोटअन्तर्गतको दोस्रो लेगमा नेपाल भियतनामविरुद्ध पहिलो हाफमै पछि परेको छ। मंगलबार भियतनामको नोङन्हात रंगशालामा जारी खेलमा घरेलु टोलीका न्गुयेन हिउ मिन्हले पहिलो हाफमै गोल गर्दै भियतनामलाई १–० को अग्रता दिलाएका हुन्।
समूह ‘एफ’ मा रहेको नेपाल यस प्रतियोगितामा पहिलो अंकको खोजीमा रहेको छ। यता, भियतनाम भने नेपालविरुद्ध दोहोरो जित हासिल गर्दै समूहमा आफ्नो पकड मजबुत बनाउन चाहन्छ।
यसअघि काठमाडौँमा सम्पन्न पहिलो लेगमा नेपाल ३–१ ले पराजित भएको थियो। सो नतिजापछि नेपाल अंकविहीन रहेको छ भने भियतनामले जितसहित उत्कृष्ट सुरुवात गरेको थियो।
छनोट चरणको समूह विजेताले सन् २०२६ मा साउदी अरबमा हुने एएफसी एसियन कपमा सिधै प्रवेश पाउनेछ। त्यसैले नेपालका लागि आजको खेल आफ्नो प्रतिष्ठा र सम्भावनाको दृष्टिले निकै महत्वपूर्ण बनेको छ।