काठमाडौं, असोज २५ गते ।
स्कटल्यान्डका अनुभवी ओपनिङ ब्याटर जर्ज मन्से आगामी नेपाल प्रिमियर लिग (एनपीएल) २०२५ मा विराटनगर किङ्सबाट खेल्ने भएका छन्।
विराटनगरले शनिबार एक विज्ञप्ति जारी गर्दै ३२ वर्षीय मन्सेलाई टिममा अनुबन्ध गरेको घोषणा गरेको हो। बाँयाहाते ब्याटर मन्से अन्तर्राष्ट्रिय क्रिकेटमा स्थायी रूपमा प्रदर्शन गर्दै आएका छन्। उनले स्कटल्यान्डका लागि ८१ टी–२० अन्तर्राष्ट्रिय खेल खेल्दा २ शतक र १३ अर्धशतकसहित २३०२ रन जोडेका छन्।
समग्र टी–२० करिअरमा मन्सेले १०२ खेलमा २६४८ रन बनाइसकेका छन्। उनी आफ्नो आक्रामक ब्याटिङ शैलीका लागि चिनिन्छन्, जसले पावरप्लेमा तीव्र सुरुवात दिलाउने गर्छ।
मन्सेले विश्वभरका विभिन्न फ्रेन्चाइज लिगहरूमा पनि उत्कृष्ट प्रदर्शन गरेका छन्। उनले दुबई क्यापिटल्स, कराची किङ्स, चेन्नई ब्रेभ्स, ब्राम्पटन वुल्भ्स र सिल्हेट स्ट्राइकर्स लगायतका टिमबाट खेलेका छन्।
विराटनगर किङ्सले गत सिजन न्युजिल्यान्डका मार्टिन गप्टिललाई टिममा समावेश गरेको थियो। यसपटक मन्से टोलीको पहिलो विदेशी साइनिङ हुन्।
एनपीएल २०२५ आगामी मंसिर १ देखि २७ गतेसम्म हुने कार्यक्रम तय भएको छ। प्रतियोगितामा देशभरका उत्कृष्ट खेलाडी र विदेशी तारा क्रिकेटरहरू सहभागी हुने अपेक्षा गरिएको छ।
