फ्रेन्च क्लब पेरिस सेन्ट जर्मेन पीएसजीले युईएफए च्याम्पियन्स लिग फुटबलको उपाधि जितेको छ । गए राति भएको फाइनलमा इन्टर मिलानलाई ५(० को फराकिलो अन्तरले हराउँदै पीएसजीले पहिलोपटक च्याम्पियन्स लिग फुटबलको उपाधि जितेको हो ।
यससँगै लुइस एनरिकेको पीएसजीले एकै सिजन तीन मुख्य उपाधि जित्दै ट्रेबल गरेको छ । पीएसजीले यसअघि नै फ्रेन्च लिग वान र फ्रेन्च कपको उपाधि जितिसकेको छ ।
लुइस एनरिकेले ट्रेबल उपाधि जित्ने दोस्रो प्रशिक्षक समेत बनेका छन् । यसअघि उनले सन् २०१५ मा बार्सिलोनाबाट ट्रेबल उपाधि जितेका थिए । एनरिके अघि पेप ग्वार्डिओलाले बार्सिलोना र म्यानचेष्टर सिटीबाट ट्रेबल उपाधि जितेका थिए ।
पीएसजीको जितमा डेसिर डुएले २ गोल गर्दा अचरफ हाकिमी, केभिचा केभारात्खेलिया र सेनी मायुलुले १(१ गोल गरे । पहिलो हाफमा २ गोल गरेको पीएसजीले दोस्रो हाफमा ३ गोल थप्यो । जर्मनीको म्युनिखस्थित एलियन्ज एरेनामा इन्टरमाथि सानदार जित सहित पीएसजीले च्याम्पियन्स लिगको ७० वर्षे इतिहासमै फाइनलमा सबैभन्दा ठूलो गोल अन्तरको जित हात पारेको हो ।
खेलको १२औं मिनेटमा डुएको पासमा ट्याप इन गोल गर्दै हाकिमीले पीएसजीलाई अग्रता दिलाए । २०औं मिनेटमा ओस्मान डेम्बेलेको पासमा डुएले प्रहार गरेको शट डिमार्कोलाई लागेर डिफ्लेक्ट भइ गोल भएको थियो । पहिलो हाफमा पीएसजी २(० ले अगाडि रह्यो ।
दोस्रो हाफको ६३औं मिनेटमा डेम्बेलेको ब्याक हिल पासमा भिटिन्हाले उपलब्ध गराएको बललाई डुएले जाली चुमाउँदै व्यक्तिगत दोस्रो गोल गरे । पीएसजी ३(० ले अघि बढ्यो ।
७३औं मिनेटमा डेम्बेलेको थ्रू बलमा केभारात्खेलियाले सोमरलाई बिट गरेर गोल गर्दै पीएसजीको अग्रता अझ फराकिलो बनाए । ८७औं मिनेटमा वैकल्पिक खेलाडी मायुलुले गोल गर्दै पीएसजीको ५ (० को जित पक्का गरे । पीएसजी च्याम्पियन्स लिगको उपाधि जित्ने दोस्रो फ्रेन्च क्लब बनेको छ । यसअघि सन् १९९३ मा मार्सेले च्याम्पियन्स लिग जितेको थियो ।
प्रशिक्षक लुइस एनरिकेका लागि यो दोस्रो च्याम्पियन्स लिग उपाधि हो । यसअघि उनले सन् २०१४ र
१५ को सिजनमा स्पेनिस क्लब बार्सिलोनालाई पनि यो सफलता दिलाएका थिए ।
पीएसजीले सेमिफाइनलमा आर्सनललाई हराएको थियो भने इन्टरले बलियो टोली बार्सिलोनाको चुनौती पन्छाएको थियो ।