काठमाडौं स्पोर्ट्स एकेडेमीको आयोजनामा आगामी कात्तिक १७ गतेदेखि ‘केएसए काठमाडौं १६ वडा कप राष्ट्रिय र्यापिड चेस प्रतियोगिता’ सञ्चालन हुने भएको छ।
काठमाडौं महानगरपालिका वडा नं. १६ र काठमाडौं जिल्ला बुद्धिचाल संघको सह–आयोजनामा हुने यो दुईदिने प्रतियोगिता नयाँ बजारस्थित मल्टि भेन्युमा हुनेछ। स्वीस लिग प्रणालीबमोजिम ९ चरणमा खेलाइने यस प्रतियोगिताको कुल पुरस्कार राशि २ लाख ५३ हजार रुपैयाँ रहेको छ।
प्रतियोगितामा सहभागी हुन खुलातर्फ १ हजार रुपैयाँ तथा महिला र १६ वर्षमुनिका खेलाडीहरूका लागि ५ सय रुपैयाँ दर्ता शुल्क तोकिएको छ भने उपत्यका बाहिरबाट आउने खेलाडीहरूको लागि निःशुल्क आवासको व्यवस्था मिलाइएको आयोजक एकेडेमीका अध्यक्ष नारायणदास गमालले जानकारी दिएका छन्।
