बागमती प्रदेशका पूर्व युवा तथा खेलकुद खेलकुद मन्त्री एवं वर्तमान सांसद् मीनकृष्ण महर्जनले २० औं एसियाली खेलकुदमा पदक जित्ने उसु खेलाडीलाई नगद पुरस्कार प्रदान गर्ने घोषणा गरेका छन् ।
ललितपुर जिल्ला खेलकुद विकास समिति र ललितपुर जिल्ला उसु संघले टोलीको सम्मानमा आयोजना गरेको बिदाइ तथा शुभकामना कार्यक्रममा महर्जनले नगद पुरस्कार घोषणा गरेको नेपाल उसु महासंघका उप–महासचिव राजीव महर्जनले जनाएका छन् । महर्जनले प्रोत्साहन स्वरुप स्वर्ण जित्ने खेलाडीलाई १ लाख ५० हजार, रजतलाई १ लाख र कांस्यलाई ५० हजार नगद पुरस्कार प्रदान गर्ने प्रतिबद्धता जनाए ।
कार्यक्रममा ललितपुर जिल्ला खेलकुद विकास समितिका अध्यक्ष विनोद महर्जनले ट्रयाकसुट पनि प्रदान गरेका थिए । यसअघि पूर्व उसु खेलाडीहरु पनि एसियाडमा कुनैपनि पदक जित्ने खेलाडीलाई ५० हजार नगद पुरस्कार दिने घोषणा गरेका थिए ।
जापानको आइची÷नागोयमा असोज ३ देखि १८ गतेसम्म हुने एसियाडमा नेपालबाट उसुमा थाउलो र सान्सौंमा गरी १० खेलाडीले प्रतिस्पर्धा गर्ने भएका छन् । नेपालबाट ८ पुरुष र २ महिला खेलाडी सहभागी हुँदै छन् । थाउलोमा ६ र सान्सौंमा ४ खेलाडीले चुनौती पेश गर्ने छन् ।
थाउलोमा विजय सिन्जाली, हरिप्रसाद गोले, राजीव तामाङ, सुस्मिता तामाङ, दीपक हमाल र सविता राईले खेल्ने छन् । सान्सौंमा रोहित चुनारा, अमर सुनार, सन्जिव महर्जन र रिता ठकुल्ला सहभागी हुने छन् । थाउलो प्रशिक्षकमा प्रकाश महर्जन तथा सान्सौं प्रशिक्षकमा तुल्सीनन्द वज्राचार्य छन् ।
